कुमाखमा बिषयगत समिती गठनमा विवाद हुँदा नीति तथा कार्यक्रम नै अन्योलमा

सल्यान जिल्लाको कुमाख गाँउपालिकामा कार्यपालिका अन्तर्गत बिषयगत समिती गठन गर्ने प्रस्तावमा विवाद भएको छ। यसै बिषयमा दुई पटक कार्यपालिकामा छ्लफल गर्दापनी बिषयगत समिति गठनमा काँग्रेस-एमाले(गठबन्धन) र माओवादी केन्द्र बिचमा सहमती कायम हुन सकेको छैन ।

माओवादी केन्द्रका जनाप्रतिनिधिले ५ वटा बिषयगत समिती मध्ये आर्थिक विकास,सामाजिक विकास,पुर्वाधार विकास मुख्य ३ वटा समितिको दावी नछोडेपछी सहमति हुन नसकेको गाँउपालिका अध्यक्ष मान बहादुर बुढाथोकीले जानकारी दिनुभयो।अध्यक्ष बुढाथोकीले भन्नुभयो प्रारम्भिक छलफलमा हामीले सामाजिक बिकास र पुर्वाधार बिकासको दावी गरेपनी पछि सहमतिको अधिकतम प्रयासको लागि ५ वटा बिषयगत समिती मध्ये सामाजिक विकास समिती मात्रै हामीलाई दिएर वाँकी ४ वटा बिषयगत समिती तपाईहरु लैजानुहोस भन्दापनी माओवादी केन्द्रका साथीहरुले मान्नुभएन तरपनी सबैलाई मिलाएर लिने दायित्व भएकोले सहमतिको लागि आफु सधैं तयार रहेको बताउनुभयो।

माओवादी केन्द्रका वडा नं १ का वडा अध्यक्ष डिल्ली रानाले जेठ ८ गते र असार ४ गतेको कार्यपालिका बैठक सौहार्दपुर्ण रुपमा केही निर्णय र छ्लफल भएपनी असार ७ गतेको बैठकमा बिषयगत समिति गठनमा गठबन्धनले छलफल नै नगरी नीति तथा कार्यक्रम ल्याउन जोड दिएकोले आफुहरुले त्यसो नगरी क्रमिक रुपमा अगाडि बढनुपर्ने धारणा राखेको बताउनुभयो ।

१५ सदस्यीय कुमाखको कार्यपालिकामा माओवादी केन्द्रका १० जना सदस्य र काँग्रेस एमाले(गठबन्धन) का ५ सदस्य छ्न। त्यस्तै ३९ सदस्यीय गाँउसभामा माओवादिका २१ सदस्य र काँग्रेस एमाले(गठबन्धन) का १८ सदस्य भएकोले गाँउपालिकाको अध्यक्ष र उपाध्यक्ष जितेर पनि गठबन्धन अल्पमतमा छ। गाँउपालिका अन्तर्गत बिषयगत समितिमा आर्थिक विकास,सामाजिक विकास,पुर्वाधार विकास,वन तथा वातावरण विपत ब्यवस्थापन र सुशासन तथा संस्थागत विकास नामक बिषयगत समिती हुने गर्दछन । योजना तर्जुमा र बजेट बाँडफाँडमा बिषयगत समितिको भूमिका विशेष हुने भएकोले पनि कार्यपालिकाको बैठकमा घनिभुत रुपमा छलफल गर्दा पनी सहमती कायम हुन सकेको छैन।