नेकपा (एमाले) का स्थायी समिति सदस्य रामबहादुर थापाले एमाले नेपालका श्रमजीवीको पार्टी भएको बताएका छन्। बिहिबार काठमाडौंमा आयोजना गरेको कार्यकर्ता भेलालाई सम्बोधन गर्दै बागमती प्रदेशको इञ्चार्जसमेत रहेका थापाले एमाले जनता र श्रमजीवीको पार्टी भएको भन्दै यसमा सबै जनताहरूको अग्रसरता हुने बताए।

बादलले देशमा देखिएको प्रतिगमनलाई एमालेले परास्त गर्ने दाबी गर्दै परमादेशमा बनेको सरकारलाई प्रतिगामी कदमको रूपमा अर्थ्याए। दक्षिणपन्थी र विसर्जनवादी एमालेबाट अलग भएको भन्दै उनले एमालेले प्रतिगमन अन्त्य गरेरै छाड्ने बताए। बादलले माधवकुमार नेपाल धेरै दिन नटिक्ने र एमालेबाट अलग भएसँगै दक्षिणपन्थ पराजित भएको जिकिर गरे। उनले दक्षिणपन्थीमाथि एमालेको विजय भएको पनि जिकिर गरे। ‘उनीहरूको अवस्था धेरै दिन टिक्नेवाला छैन । समाजवादी धारालाई विकसित गर्दै दक्षिणपन्थी र पुँजीपति धारविरुद्ध सदन र सडकमा संघर्ष अघि बढाउँदै विजय हासिल गर्छौं,’ उनले भने।

नेकपा एमालेको संगठन संरचना २०७५ जेठ २ मा फर्किएको बताइए पनि एमालेका अधिकांश कार्यक्रममा त्यसको ‘कार्यान्वयन’ नभएको पाइन्छ। पार्टी भित्र भएको विवाद समाधानका लागि भएको १० बुँदे सहमति कार्यान्वयनलाई लैजाने भनिए पनि त्यसको पूर्ण पालना भने भएको छैन।